FIFA dünya çempionatı ilə bağlı "TikTok" platforması ilə strateji tərəfdaşlıq qurduğunu rəsmi şəkildə elan edib.

Matc.az xəbər verir ki, əməkdaşlıq barədə "The Athletic" nəşri məlumat yayıb.

Razılaşma çərçivəsində mundialın oyunlarından olan video fraqmentlər real vaxt rejimində birbaşa "TikTok" tətbiqində yayımlanacaq. Layihənin əsas məqsədi futbol izləməni qlobal auditoriya üçün daha yaxın və anlaşılan etmək, həmçinin meydandakı hadisələrə yeni azarkeşlər cəlb etməkdir.

Birbaşa oyun epizodları ilə yanaşı, FIFA məhdud sayda kontent istehsalçılarına milli komandaların məşqlərinə və mətbuat konfranslarına xüsusi giriş imkanı təqdim edəcək. "TikTok"un məlumatına görə, platformada idman məzmununa baxan istifadəçilər oyunların tam yayımına 42 faiz daha çox keçid edirlər.

Bundan əlavə, "TikTok" azarkeşlər üçün praktik məlumat mənbəyinə çevriləcək. Xüsusilə dünya çempionatının oyunlarına biletlərlə bağlı. İştirakçılığı artırmaq məqsədilə filtrlər və tematik stikerlər də daxil olmaqla interaktiv oyun elementləri təqdim olunacaq.

Qeyd edək ki, "TikTok" daha əvvəl “Börnli”nin qadın komandası, qadınlar arasında Avropa çempionatı, Klublararası Dünya Çempionatı, eləcə də Banqladeşin qadınlar Superliqası ilə əməkdaşlıq edib. Futboldan əlavə, platforma "ATP Tour" tennis turniri və "PGA Tour" qolf yarışı ilə tərəfdaşlıqlar vasitəsilə idmandakı mövqeyini genişləndirir.