Fransa millisinin baş məşqçisi Didye Deşam 2026-cı il dünya çempionatında Seneqala 3:1 hesabı ilə qalib gəldikləri oyunda Kilian Mbappenin çıxışını şərh edib.

Matc.az xəbər verir ki, təcrübəli mütəxəssisin sözləri "Le Figaro" nəşrində yer alıb.

İki qol vuran hücumçusunu tərifləyən Didye Deşam onun barəsində maraqlı fikirlər səsləndirib:

"Onu tənqid edənlər hələ də olacaq. O, müstəsna oyunçudur. Ən yaxşı oyununu göstərməsə belə, bir an komandasına qələbə gətirmək üçün kifayətdir. Əminəm ki, mərkəzi hücum mövqeyi onun üçün optimal mövqedir. Eyni zamanda, o, sərbəst hərəkət edə və oynaya bilər. Onun üçün çox xoşbəxtəm. Əgər ilk hissədə əla oyun göstərməsə, amma fasilədən sonra iki qol vursa, bu, mənim üçün tamamilə normaldır. O, özünə şübhə etmir; bu, onun təbiətində deyil. Bütün matçda dörd, hətta beş qol vura bilərdi. O, bütün komandanın aynası idi".

Qeyd edək ki, bu 2 qolla Kilian Mbappenin hesabında artıq 14 dünya çempionatı qolu var. O, rekordçular Miroslav Kloze və Lionel Messidən cəmi 2 qol geridədir.

Fransa millisi turnirdəki növbəti oyununu iyunun 23-də gecə yarısı İraqa qarşı keçirəcək.